Gala Final «Cachinus de cine»

¡Gran fin de semana pa u IESO VAL DE XÁLIMA!

Esti fin de semana hemus celebrau a gran festa du cini en Cileirus i a sua VIII edición du Festival Internacional de cortos «Cachinus de cini».

U nosu centru participaba esta vé presentandu un cortu na modalidai educativa chamau «Agila», nu que participara u alumnau de 4º da ESO du instituto, varius profesoris i personal du centru; así comu varius miembrus du grupu de teatru «Rosa de Alejandría». Na parti técnica contamus con a ajuda de Samuel Pascual Flores, antigu alumnu du institutu.

Tuvimus a sorti de quedal finalistas en tres categorías: A de millol cortu extremeñu, u millol cortu da serra de Gata i u de millol intérpreti infantil pa Lucía Robledo, a protagonista du nosu cortu.

U vernis se fizu a presentación oficial du cortu pa u públicu en general i a nosa directora pudu contal cómu foi u procesu i a importancia da fala nu cortu i na zona.

U sábadu foi un día de mutus nervius i emocións, que chegaran au sei puntu culmin con u premiu a «Millol cortu da Serra de Gata». ¡Estábamus que nun cabíamus de alegría!

Despois pudimus celebral con us demás nominaus i gañadoris, gracias a gran organización que tiña a Asociación Cultural de Cileirus.

Pa nos ha síu un fin de semana emocionanti, que ha síu posibli gracias au traballu de nosus alumnus i colaboradoris, i sobre tó por a genti que se empeña en ficel u centru mutu millol.